西貢由原來既小漁港變成今日充滿著歐陸風情既休閒國度，由享受陽光與海灘、品嘗新鮮捕獲既海鮮以及參觀香港罕有既火山岩地質面貌，西貢既生活遠比我地平日想像既更豐富、更吸引。今日帶大家睇下如何「樂活西貢」:
海灘
水清沙幼既海灘似乎已經同西貢掛釣，只要提起西貢，往往會諗起一幅陽光與海灘既美好畫面。西貢既銀線灣以及清水灣第一灣、第二灣海灘絕對唔會令你失望，寬闊既大海配以西貢翠綠的山林環繞，去海灘浸一浸已經成為西貢人生活既一部分。
水上活動
西貢可以話係香港最齊全、最好玩既水上活動地區，由獨木舟、滑水、船p、水上電單車等應有盡有，因為競爭大，係西貢玩水上活動既選擇又多、價錢亦合理。想享受夏天? 淨係去海灘哂太陽邊到夠! 同一班朋友係西貢出海、玩下香蕉船同wakeboarding先至過癮!
地質之旅
作為中國香港世界地質公園既一部分，西貢火山岩園區入面擁有各樣令人讚嘆既大自然面貌，獨有既火山岩形成既海蝕洞、雄偉既海蝕穴以及糧船灣內罕見既火山岩六角形岩柱等等，宏偉既大自然痕跡更令西貢增添其獨特既魅力。
行山
除左海，西貢既行山徑亦係好多西貢人引以為榮既地方。沿住行山徑會經過西貢浪茄同萬宜水庫 ，途中可以欣賞附近既迷人景色同呼吸自然既空氣，係香港少數可以遠離煩囂既好去處。唔少西貢人都會帶埋狗仔去行下山、行下海滂，成個西貢都係一個pet-friendly既社區，唔使驚你既狗仔係到搵唔到朋友仔!
食海鮮
沿住西貢海滂會見到唔少漁販會係停泊緊既小舟上擺放各種海產，而客人就係岸上面選購; 買完海鮮仲可以即刻攞到隔離既海鮮街，由經驗老到既師傅幫你烹調，點煮點食都可以自己話事。所以話西貢人真係有口福!!
夜西貢
講到夜生活，可能大家只會諗起落老蘭clubbing un un 下，同異性flirt 下既生活。但西貢既夜生活依然保持住一種舒服、慢活既態度: 一班知己可以去西貢既露天酒吧，係海風既襯托下飲住酒吹下水; 講到西貢既夜晚，當然不得不提夜釣墨魚啦，夜媽媽都仲有得玩有得食，除左西貢仲去邊到搵?!
