唔講唔知，尖沙咀呢個名其實由明、清朝嗰陣已經有記載啦。顧名思義，就係好尖嘅沙咀咁解，姐係咩？指嘅係沙灘、海灣。睇返之前嘅地形圖，你就清楚哂架啦。講返依家，時至今日，大家都知尖沙咀已經發展為一個多元化嘅地區之一，要文化有文化，要餐廳有餐廳，一應俱全。
文化
單單係尖沙咀呢度，數數下已經有唔同嘅地方文化你可以搵得到。想要kimchi？有金巴利街呢條韓國街，有好多唔同嘅韓國餐廳喺度架。想要宗教色彩？亦有全港最大嘅一座回教清真寺，行過你都會見到唔少信徒專程尼架。行過對面，又有唔少南亞裔人士聚居嘅重慶大廈。英式建築？都有！香港非常出名嘅半島酒店咪就係喺呢度囉。
飲食
上邊提到有條韓國街，真係有幾多韓國餐廳，鐘意食嘅朋友不妨去行個圈，出邊嘅店員都好用心會用韓文尼請你入去食架。諾士佛臺亦有唔少特色餐廳同酒吧，鐘意fusion菜呀、西班牙菜呀、日本菜呀等等唔同地方嘅異國菜式，又或者想同朋友嘆返杯？尼呢度實冇錯！另外尖沙咀亦都有唔同大型商場，例如The One、I Square、海港城等等，都有唔少餐廳任君選擇架，行完街肚仔餓都冇有怕！
旅遊
估唔到尖沙咀地方細細，單單係博物館都已經有三、四間。上至天文，下至地理，穿越古代學歷史，又或者探索現今未來科學？咁尖沙咀你就岩啦。除左博物館，唔少特色建築你亦可以搵得到，星光大道、前水警總部、聖安德烈堂等等，你又點可以錯過呀？
